wo harf-o-saut-o-sada

vo harf jo faza-e-nilgun ki vusaton men qaid tha

vo saut jo hisar-e-khamushi men jalva-rez thi

sada jo kohsar ki bulandiyon pe mahv-e-khvab thi

rida-e-barf se Dhaki

vo lafz jo faza ke niile anchalon se chhan ke

jazb ho raha tha

reg-zar-e-vaqt men

jo zarra zarra muntashir tha

dhundli dhundli saaton ki gard men

vo maani-e-gurez-pa

laraz raha tha jo rag-e-hayat men

vo ramz-e-muntazir ki jo abhi nihan tha

batn-e-kaenat men

vo harf-o-saut-o-sada

vo lafz-e-muntashir

vo ramz-e-muntashir

vo maani-e-gurez-pa

bas ek jast men

hisar-e-khamushi ko tod kar

pighal ke mere dard-o-arzu ki aanch men

nava-o-nutq ki sabahaton men Dhal gaya

vo abshar-e-naghma-o-nava

ki kohsar-e-sard se gira

ki gunjti guphaon se ubal pada

vo ju-e-zat

naghma-e-hayat

jo ravan-davan hai bahr-e-be-karan ki khoj men

Leave a Comment