bhaTak rahe hain bhaTakte rahenge farzane
qarib aa ga.e manzil ke tere divane
bahut qarib the jalve unhen na pahchane
kahan gaya tha shu.ur-e-nazar ḳhuda jaane
zaban pe harf-e-tamanna na aa.e kya parva
simaT ke aa ga.e nazron men dil ke virane
huzur-e-husn jo aa.e hain bahr-e-arz murad
unhen sunao miri ḳhamushi ke afsane
guzar ga.i miri rudad-e-gham men raat tamam
phir us ke ba.ad na sham.en jalin na parvane
talash-e-kucha-e-janan are ma.az-allah
ḳhud apni gard men kho.e hue hain divane
‘nasir’ un ki samajh men bhi kuchh nahin aaya
jo aa rahe hain mujhe raz-e-ishq samjhane
Leave a Reply