achchhe nahin hain vaqt ke tevar mire aziiz
rahna hai apni khaal ke andar mire aziiz
teri munafiqat pe mujhe koi shak nahin
mere rafiq mere baradar mire aziiz
aa teri tishnagi ka mudava hai mere paas
mera lahu halal hai tujh par mire aziiz
ehsas jis ka naam hai vo chiiz mustaqil
chubhti hai mere zehn ke andar mire aziiz
aur is men tair kar mujhe hona hai surḳh-ru
darpesh hai lahu ka samundar mire aziiz
nadan vahimon ke ta.aqub se baaz aa
koi nahin kisi ka yaqin kar mire aziiz
mumkin jo ho to us se riha.i dila mujhe
mujh par hai bar-e-dosh mira sar mire aziiz
iz.har-e-haq se baaz kab aate hain aise log
‘rahi’ ho ya hon ‘shad’-o-‘muzaffar’ mire aziiz
Leave a Reply