har samt uḌi gard mire shahr-e-guman men
mahsur tamanna hai zamane ke dhuan men
sannaTe ka jo qissa sunane men magan hai
raqsan tha kabhi shor usi ujḌe makan men
ḳhushiyon ko badan par jo lapeTe hue kal tha
hai aaj sharabor vahi dard nihan men
ma.adum hua gul ka nishan sahn-e-chaman se
ḳhushbu hai magar ab bhi basi bad-e-ravan men
har ḳhvab ki ta.abir nazar aa.i hirasan
napaid hua josh-e-junun mard-e-javan men
farda ki gali men vo baḌa kaam karegi
ik zid hai khilaune ki jo ma.asum fughan men
guzri hui saa.at ko palaTne men laga hai
kuchh baat nazar aa.i use kar-e-ziyan men
pur-kaif hui ‘sahni’ har saans ki aahaT
mauhum ishara jo mila vaqt-e-giran men
Leave a Reply