Barbaad-E-Tamanna Pe Itab Aur Ziyaada

barbad-e-tamanna pe itaab aur ziyada

haan meri mohabbat ka javab aur ziyada

roen na abhi ahl-e-nazar haal pe mere

hona hai abhi mujh ko kharab aur ziyada

avara o majnun hi pe mauquf nahin kuchh

milne hain abhi mujh ko khitab aur ziyada

utthenge abhi aur bhi tufan mire dil se

dekhunga abhi ishq ke khvab aur ziyada

tapkega lahu aur mire dida-e-tar se

dhadkega dil-e-khana-kharab aur ziyada

hogi miri baton se unhen aur bhi hairat

aaega unhen mujh se hijab aur ziyada

use mutrib-e-bebak koi aur bhi naghma

ai saqi-e-fayyaz sharab aur ziyada

Leave a Comment