Aziz Lakhnavi
ek hi ḳhat men hai kya haal jo mazkur nahin
dil to dil ishq men saada varaq-e-tur nahin
ek ham hain ki kisi baat ka maqdur nahin
ek vo hain ki kisi rang men majbur nahin
imtihan-gah-e-mohabbat nahin gul-e-zar-e-ḳhalil
kaun aisa hai jo zaḳhmon se yahan chuur nahin
naza.a ka vaqt hai baiTha hai sirhane koi
vaqt ab vo hai ki marna hamen manzur nahin
qabil-e-ghaur hai ai jalva-paristan-e-azal
ye kahani hai miri vaqia-e-tur nahin
misr ka chand ho aghosh men zindan ke tulua
fitrat-e-husn badal jaa.e to kuchh duur nahin
sar jhuka.e dar-e-daulat se palaTne vaale
be-niyazi ki ada.en hain vo maghrur nahin
jubba-sa.i bhi gavara nahin karta koi
uTh ke jaana dar-e-daulat se bhi dastur nahin
ishq men sarhad-e-manzil se kuchh aage honge
us ka rona hai koi sa.i bhi mashkur nahin
dil men paivast hui thi jo mire roz-e-azal
hai vahi shoḳh-nazar sa.iqa-e-tur nahin
dil ko bhi di ga.i hai ḳhidmat-e-dard-e-abadi
sirf ankhen hi miri rone pe ma.amur nahin
sar-e-mizhgan mire aansu ka sitara chamka
daar par ab asar-e-jazba-e-mansur nahin
saad surḳhi se kiya kis ne sar-e-fard-e-jamal
apne aalam men tire dida-e-maḳhmur nahin
zindagi ḳhatm hui jab to ik avaz suni
aa gaya main tire nazdik bas ab duur nahin
ruuh kahti hui nikli hai dam-e-naz.a ‘aziz’
un se is bazm men milna hamen manzur nahin
Leave a Reply