aarzu bhi to kar nahin aati
dil men hai honth par nahin aati
vasl ki raat ke siva koi shaam
saath le kar sahar nahin aati
chali jaati hai un ke ghar miri niind
ja ke phir rat-bhar nahin aati
vo mujhe koste hain o tasir
arsh se tu utar nahin aati
pahle aati thi ai qafas vaalo
ab saba bhi idhar nahin aati
chup khade hain vo pesh-e-davar-e-hashr
bhule hain baat kar nahin aati
kabhi aa jaati thi muqaddar par
ab hansi honth par nahin aati
are vaaiz dara na tu itna
kya use darguzar nahin aati
jab tak aae na koi chand si shakl
shab-e-mah mere ghar nahin aati
hashr ke din bhi daagh daman men
sharm ai chashm-e-tar nahin aati
kamar in ki bahut hi nazuk hai
zulf bhi ta-kamar nahin aati
gham hain rah-e-junun men ahl-e-junun
hain magar kuchh khabar nahin aati
aap ko apni aarsi ke siva
achchhi surat nazar nahin aati
sharm aati hai dil men sau sau baar
tauba lab par magar nahin aati
va-e-qismat ki bekasi bhi ‘riyaz’
ab miri qabr par nahin aati