ham apni ruuh ke uupar azaab dekhte hain
ki roz tujh se bichhaḌne ka ḳhvab dekhte hain
kabhi kabhi to hamen bhi yaqin nahin aata
ki ham bahar men jalte gulab dekhte hain
tumhari chashm-e-tamanna ko dekhne vaale
koi ḳhazana-e-gham zer-e-ab dekhte hain
bas ek aas ke rishte pe umr kaTti hai
ki ḳhushk peḌ musalsal sarab dekhte hain
jahan junun ki tamazat pe harf aata ho
ham us maqam pe ik inqalab dekhte hain
hamare qad ka tum andaza kya lagaoge
ham aankh muund ke sahra men aab dekhte hain
ye shahr-e-ishq to ‘afaq’ ho nahin sakta
ham is ilaqe ka mausam ḳharab dekhte hain
Leave a Reply