Shahzad Ahmad
jaan muqaddar men thi jaan se pyara na tha
mere liye sub.h thi sub.h ka taara na tha
bahr-e-shab-o-roz men bah ga.e tinke se ham
mauj-e-bala-ḳhez thi aur kinara na tha
jaan ke dushman the sab log tire shahr ke
umr kaTi jis jagah pal bhi guzara na tha
sard rahi umr bhar anjuman-e-arzu
ḳhar-o-ḳhas-e-shauq men koi sharara na tha
kis ke liye jagte kis ki taraf bhagte
itne baḌe shahr men koi hamara na tha
shauq-e-safar be-sabab aur safar be-talab
us ki taraf chal diye jis ne pukara na tha
duur sahi manzilen ab na rahin himmaten
TuuT ga.e pa-e-shauq dil abhi haara na tha
Leave a Reply