Wamiq Jaunpuri
umr ki rau badal ga.i shayad
ham se aage nikal ga.i shayad
lauh par chand TeḌhe meḌhe ḳhutut
meri surat badal ga.i shayad
phir charagh-e-sutun-e-dar bujha
aaj phir maut Tal ga.i shayad
mai-kade men paḌi hai us ki laash
vo phaTi hanDi chal ga.i shayad
sarkashi ḳhud-kashi pe ḳhatm hui
ek rassi thi jal ga.i shayad
kuchh nahin baaqi ab ba-juz ḳhushbu
kya javani thi Dhal ga.i shayad
Leave a Reply