dard ho dil men to dava kiije
aur jo dil hi na ho to kya kiije
gham men kuchh gham ka mashghala kiije
dard ki dard se dava kiije
aap aur ahd-e-pur-vafa kiije
tauba tauba ḳhuda ḳhuda kiije
dekhta huun jo hashr ke asar
apne tevar mulahiza kiije
nazar-e-iltifat ban ga.i maut
miri qismat ko aap kya kiije
dekhiye maqtaza-e-hal-e-mariz
ab dava chhoḌiye dava kiije
chaar din ki hayat men ‘manzar’
kyuun kisi se bhi dil bura kiije
Leave a Reply