Rang-E-Dil Rang-E-Nazar Yaad Aaya

rang-e-dil rang-e-nazar yaad aaya

tere jalvon ka asar yaad aaya

vo nazar ban ga.i paigham-e-hayat

halqa-e-sham-o-sahar yaad aaya

ye zamana ye dil-e-divana

rishta-e-sang-o-guhar yaad aaya

ye naya shahr ye raushan rahen

apna andaz-e-safar yaad aaya

raah ka ruup bani dhuup apni

koi saaya na shajar yaad aaya

kab na us shahr men patthar barse

kab na us shahr men sar yaad aaya

ghar men tha dasht-navardi ka ḳhayal

dasht men aa.e to ghar yaad aaya

gard uḌti hai sar-e-rah-e-ḳhayal

dil-e-nadan ka safar yaad aaya

ek hansti hui badli dekhi

ek jalta hua ghar yaad aaya

is tarah shaam ke saa.e phaile

raat ka pichhla pahar yaad aaya

phir chale ghar se tamasha ban kar

phir tira rauzan-e-dar yaad aaya

kisi patthar ki haqiqat hi kya

dil ka a.ina magar yaad aaya

aanch daman-e-saba se aa.i

e.atibar-e-gul-e-tar yaad aaya

dil jala dhuup men aisa ab ke

paanv yaad aa.e na sar yaad aaya

gar paḌe haath se kaghaz ‘baqi’

apni mehnat ka samar yaad aaya