Shahnaz Parveen Sahar
saans dar saans ra.egani men
kaT ga.i umr be-dhiyani men
hujra-e-zat men charagh jala
rah-numa.i thi rah-e-fani men
main sunati thi dastan-e-tarab
dard hansta raha kahani men
hain zaman-o-makan hijrat men
alam-e-hu ki la-makani men
koi surat sambhal nahin paa.i
vaqt ki be-karan ravani men
baat be-bat hansti rahti thi
kitni gustaḳh thi javani men
bhiiḌ se duur baiThi rahti huun
baat karti huun be-zabani men
phir ye avaz Duub ja.egi
jism ki be-nishan kahani men
vo falak par nahin milega ‘sahar’
chand kal gir gaya tha paani men
Leave a Reply