mujh ko kya faeda gar koi raha mere baad
saari makhluq bala se ho fana mere baad
mar chuka main to nahin us se mujhe kuchh hasil
barse gar paani ki ja ab-e-baqa mere baad
chahne valon ka karta hai zamana matam
matami rang men hai zulf-e-rasa mere baad
roenge mujh ko mire dost sab aath aath aansu
barsegi qabr pe ghanghor ghata mere baad
yuun hi khilti rahengi sehn-e-chaman men kaliyan
yunhi chalti rahegi bad-e-saba mere baad
jaan dene ko na un par koi tayyar hua
goya jan-baz zamane men na tha mere baad
haath se un ke tapakte nahin mai ke qatre
ashk-e-khun rota hai ye rang-e-hina mere baad
hashr tak koi na rokega sitam-garon ko
jo khuda pahle tha vo hi hai khuda mere baad
jite-ji dete the jo galiyan mujh ko ‘parvin’
maghfirat ke liye karte hain dua mere baad
Leave a Reply