sambhal na paa.e to taqsir-e-vaqa.i bhi nahin
har ik pe sahal kuchh adab-e-mai-kashi bhi nahin
idhar udhar se hadis-e-gham-e-jahan kah kar
tiri hi baat ki aur teri baat ki bhi nahin
vafa-e-vada pe dil nukta-chin hai vo ḳhamosh
hadis-e-mehr-o-vafa aaj guftani bhi nahin
bikhar ke husn-e-jahan ka nizam kya hoga
ye barhami tiri zulfon ki barhami bhi nahin
shikast-e-saghar-o-mina ko ḳhaak rota main
giran abhi mire dil ki shikastagi bhi nahin
hazar shukr ki be-ḳhvab hai sahar ke liye
vo chashm-e-naz ki jo jagton men thi bhi nahin
ye zindagi hi talavvun-mizaj hai ai dost
tamam tark-e-vafa teri be-ruḳhi bhi nahin
ta.alluqat-e-zamana ki ik kaḌi ke siva
kuchh aur ye tira paiman-e-dosti bhi nahin
karam ki vajah na thi be-sabab ḳhafa bhi hai vo
mizaj-e-husn se ye baat duur thi bhi nahin
Leave a Reply