Abhi Guzre dinon Ki Kuchh Sadaen Shor Karti Hain

Yasmeen Habeeb

abhi guzre dinon ki kuchh sadaen shor karti hain

dariche band rahne do, havaen shor karti hain

yahi to fikr ke jalte paron pe taziyana hai

ki har tarik kamre men duaen shor karti hain

kaha na tha hisar-e-ism-e-azam khinchne vaale

yahan aaseb rahte hain balaen shor karti hain

hamen bhi tajraba hai be-ghari ka chhat na hone ka

darinde, bijliyan, kaali ghataen shor karti hain

abhi gard-e-safar ke girye ki hai guunj kanon men

abhi kyuun muntazir khali saraen shor karti hain

hamen sairab rakkha hai khuda ka shukr hai us ne

jahan banjar zaminen hon anaen shor karti hain