Farq Kuchh To Chahiye Aghyar Se

farq kuchh to chahiye aghyar se

sirr-e-ulfat ham chhupaen yaar se

apni ankhon se agar tashbih duun

ashk tapke rauzan-e-divar se

baat un ki mo’tabar hai sach kaha

haal mera puchhiye aghyar se

us ki choti men nahin mubaf surkh

uthe hain shole dahan-e-mar se

dhuup men baithun ki khajlat se udu

bhaag jaaen saya-e-divar se

paas se tere uthati ghair ko

zor ho sakta jo chashm-e-zar se

chhutti hain munh pe kya mahtabiyan

vasl ke din saya-e-divar se

sau tarah ki fikr men taskin’ pade

dil laga kar us but-e-ayyar se

Leave a Comment