Ejaz Ansari
ḳhuda use bhi kisi din zaval deta hai
zamana jis ke hunar ki misal deta hai
vo jab shu.ur ko lafzon men Dhaal deta hai
ajiib soch nirale ḳhayal deta hai
koi samajh na saka us ki den ka andaza
kabhi ḳhushi kabhi ranj-o-malal deta hai
kabhi vo zaḳhm lagata hai mere siine par
kabhi vo paanv se kanTa nikal deta hai
usi ne di hai gunah-o-savab ki tafriq
vahi shu.ur-e-haram-o-halal deta hai
mire ḳhuda use sanjidgi ata kar de
vo meri baat ko hans hans ke Taal deta hai
kabhi kinare bhi kashti bacha nahin sakte
kabhi bhanvar bhi safine uchhal deta hai
vo kar guzarta hai aksar mira junun ‘ejaz’
ki jo ḳhirad ko bhi hairat men Daal deta hai
Leave a Reply