Poet
jo ansuon ki zaban ko miyan samajhne lage
samundaron ka vo dard-e-nihan samajhne lage
ye jab se jaana ki zahr-e-badan nikalta hai
ham ansuon ko bhi jins-e-giran samajhne lage
jo Tapke daman-e-hasti pe ashk-e-ḳhun mere
to ahl-e-zar use gul-kariyan samajhne lage
saron pe oḌh ke mazdur dhuup ki chadar
ḳhud apne sar pe use sa.eban samajhne lage
shajar ko apni zamin se lipaT ke rahna hai
ye baat uḌte parinde kahan samajhne lage
main chup hua tha ki Takrav ḳhatm ho jaa.e
vo mere sabr ko kamzoriyan samajhne lage
vo jab se aa ga.e mehman ban ke a.ankhon men
ham apne dil ke khanDar ko makan samajhne lage
Leave a Reply