Badal-E-Lazzat-E-Azar Kahan Se Laun

badal-e-lazzat-e-azar kahan se la.un

ab tujhe ai sitam-e-yar kahan se la.un

pursish-e-hal pe hai khatir-e-janan maail

jurat-e-koshish-e-izhar kahan se la.un

hai vahan shan-e-taghaful ko jafa se bhi gurez

iltifat-e-nigah-e-yar kahan se la.un

nuur anqa hai shab-e-hijr ki tariki men

jalva-e-subh ke asar kahan se la.un

sohbat-e-ahl-e-safa khuub hai maana lekin

raunaq-e-khana-e-khummar kahan se la.un

sher mere bhi hain pur-dard va-lekin ‘hasrat’

‘mir’ ka sheva-e-guftar kahan se la.un

Leave a Comment