Sajida Zaidi
ik nashtar-e-nazar ke talabgar ham bhi hain
daata ho tum ghamon ke to gham-khvar ham bhi hain
hairan khade hue unhin rahon men hain hanuz
ai rahravan-e-kucha-e-dil-dar ham bhi hain
dariya samajh liya jise nikla vahi sarab
ik harf-e-tishnagi ke gunahgar ham bhi hain
munh rah-e-najd-e-shauq se moda nahin abhi
haan jurm-e-khastagi ke khatavar ham bhi hain
is baagh men ki zagh-o-zaghan hain amin-e-gul
khamosh dekhne ke saza-var ham bhi hain
Leave a Reply