vaaiz milegi khuld men kab is qadar sharab
paani ke badle piite hain ai be-khabar sharab
aamad men us ki mast hue kuchh khabar nahin
saaqi hai kaun jaam kahan aur kidhar sharab
us qulzum-e-gunah men duuba hua huun main
jis men hai ek mauja-e-daman-e-tar sharab
masti men un ko lag gai lau aur ghair ki
deni shab-e-visal na thi is qadar sharab
iqrar-e-vasl aur vo mast-e-ghurur-e-naz
aaya hai pi ke tu kahin ai nama-bar sharab
main ek baar aankh chura kar jo pi gaya
laaya na zakhm dhone ko phir charagar sharab
karna tha mujh ko hiila shikast-e-khumar ka
deni thi khuub qabl-e-tulu-e-sahar sharab
rukhsat ka hosh un ko na rahta shab-e-visal
kuchh bolte to ye ki dhari hai kidhar sharab
‘salik’ mile jo bazm men us ki to lutf hai
varna piya hi karte hain ham apne ghar sharab