sukut-e-sham se ghabra na jaa.e aḳhir tu
mire dayar se guzri jo ai kiran phir tu
libas-e-jan men nahin sho.alagi ka rang magar
jhulas raha hai mire saath kyuun ba-zahir tu
vafa-e-vada-o-paiman ka e’tibar bhi kya
ki main to sahab-e-iman huun aur munkir tu
mire vajud men ik be-zaban samundar hai
utar ke dekh safine se meri ḳhatir tu
main shaḳh-e-sabz nahin mahram-e-saba bhi nahin
mire fareb men kyuun aa gaya hai taa.ir tu
isi ummid pe jalte hain raston men charagh
kabhi to lauT ke aa.ega ai musafir tu
Leave a Reply