Poet
gharibon par nuzul-e-har-bala-e-na-gahan kyon ho
ye one way mustaqil traffic bhala ai asman kyon ho
agar aana hua to ek filmi giit ga.ega
miri mayyat pe vo hasb-e-rivayat nauha-ḳhvan kyon ho
ye kya andaz hai yarab samajhna jis ko mushkil hai
zarifana-sitam marghub-e-ḳhu-e-dostan kyon ho
uTha ke sar se uncha pahle vo mujh ko paTaḳhte hain
bahut hi pyaar se phir puchhte hain nim-jan kyon ho
mohabbat ko to tum ne koi tug of war samjha hai
na khincho gar tum apne ko kashakash darmiyan kyon ho
use jab naql karne ki ijazat mil ga.i tum se
adu ko Top karna hai to mera imtihan kyon ho
bechara sach jahan se dum daba kar kab ka bhaga hai
ta.aqub men abhi tak us ke phir saara jahan kyon ho
dam-e-guftar jo biivi se aksar maat khata hai
sar-e-mimbar vahi vaa.iz baḌa mojiz-bayan kyon ho
ghurur-e-husn ki pasti hai us ka raaz ai ‘qazi’
jise bachchon se nafrat ho vo das bachchon ki maan kyon ho
Leave a Reply