Zamin Ke Chand-Sitaron Ko Nind Aati Hai

zamīñ ke chāñd-sitāroñ ko niiñd aatī hai

hayāt-baḳhsh bahāroñ ko niiñd aatī hai

abhī chaman kā muqaddar chamak nahīñ saktā

abhī chaman kī bahāroñ ko niiñd aatī hai

janāza ashkoñ kā palkoñ ke dosh par hai abhī

isī liye to nazāroñ ko niiñd aatī hai

nizām-e-bazm-e-gulistāñ badal gayā shāyad

chaman kī god meñ ḳhāroñ ko niiñd aatī hai

ab inqilāb-e-zamāna kī fikr kaun kare

tirī nigāh ke māroñ ko niiñd aatī hai

na Duub jaa.e kahīñ nabz-e-zindagī ‘maikash’

sahar kā vaqt hai tāroñ ko niiñd aatī hai

Leave a Comment