Sahir Hoshiyarpuri
ishq kya chiiz hai ye puchhiye parvane se
zindagi jis ko mayassar hui jal jaane se
maut ka ḳhauf ho kya ishq ke divane ko
maut ḳhud kanpti hai ishq ke divane se
ho gaya Dher vahin aah bhi nikli na koi
jaane kya baat kahi sham.a ne parvane se
husn be-ishq kahin rah nahin sakta zinda
bujh ga.i sham.a bhi parvane ke jal jaane se
khaa.e jaati hai nadamat mujhe is ghaflat ki
hosh men aa ke chala aaya huun maiḳhane se
kar diya gardish-e-ayyam ne rusva ‘sahir’
mujh ko shikva hai yagane se na begane se
Leave a Reply