zamzama kis ki zaban par ba-dil-e-shad aaya
munh na khola tha ki par bandhne sayyad aaya
qad jo buuta sa tira sarv-e-ravan yaad aaya
ghash pe ghash mujh ko chaman men tah-e-shamshad aaya
le udi dil ko su-e-dasht hava-e-vahshat
phir ye jhonka mujhe kar dene ko barbad aaya
kis qadar dil se faramosh kiya ashiq ko
na kabhi aap ko bhule se bhi main yaad aaya
dil hua sarv-e-gulistan ke nazare se nihal
shajar-e-qamat-e-dildar mujhe yaad aaya
ho gai qata asiri men umid-e-parvaz
ud gae hosh jo par katne sayyad aaya
ho gaya hasrat-e-parvaz men dil sau tukde
ham ne dekha jo qafas ko to falak yaad aaya
Leave a Reply