hasrat-mohani

Husn-E-Be-Parwa Ko Khud-Bin O Khud-Ara Kar Diya

husn-e-be-parva ko khud-bin o khud-ara kar diya

kya kiya main ne ki izhar-e-tamanna kar diya

badh gaiin tum se to mil kar aur bhi betabiyan

ham ye samjhe the ki ab dil ko shakeba kar diya

padh ke tera khat mire dil ki ajab halat hui

iztirab-e-shauq ne ik hashr barpa kar diya

ham rahe yaan tak tiri khidmat men sargarm-e-niyaz

tujh ko akhir ashna-e-naz-e-beja kar diya

ab nahin dil ko kisi surat kisi pahlu qarar

us nigah-e-naz ne kya sehr aisa kar diya

ishq se tere badhe kya kya dilon ke martabe

mehr zarron ko kiya qatron ko dariya kar diya

kyuun na ho teri mohabbat se munavvar jaan o dil

shama jab raushan hui ghar men ujala kar diya

teri mahfil se uthata ghair mujh ko kya majal

dekhta tha main ki tu ne bhi ishara kar diya

sab ghalat kahte the lutf-e-yar ko vajh-e-sukun

dard-e-dil us ne to ‘hasrat’ aur duuna kar diya

More Poems

Leave a Comment