kuchh zarurat se kam kiya gaya hai
tere jaane ka gham kiya gaya hai
ta-qayamat hare bhare rahenge
in daraḳhton pe dam kiya gaya hai
is liye raushni men ThanDak hai
kuchh charaghon ko nam kiya gaya hai
kya ye kam hai ki aḳhiri bosa
us jabin par raqam kiya gaya hai
paniyon ko bhi ḳhvab aane lage
ashk dariya men zam kiya gaya hai
un ki ankhon ka tazkira kar ke
meri ankhon ko nam kiya gaya hai
dhuul men aT ga.e hain saare ghazal
itni shiddat se ram kiya gaya hai
Leave a Reply