dil to hazir hai agar kijiye phir naaz se ramz
hain tire naaz ke sadqe isi andaz se ramz
ramz-o-ima-o-kinae tujhe sab yaad hain yaar
ham to bhule hain gham-e-ghamza-e-ghammaz se ramz
apni na-fahmi se main aur na kuchh kar baithun
is tarah se tumhen jaaez nahin eajaz se ramz
dil ko tu sahj men levega ye main jaan chuka
yahi nikli hain tiri sahj ki avaz se ramz
ham jien ya ki maren kuchh nahin gham shauq se aap
masnad-e-naz pe farmaiye eazaz se ramz
main isi dam tiri tarvar se katunga gala
tegh dikhla ke miyan ashiq-e-jan-baz se ramz
baaz jaddam se dar-e-adl-e-shah-e-alam hai
bachcha-e-qaz bhi karta hai yahan baaz se ramz
kya taajjub hai agar murda-e-sad-sala jien
kam nahin mere masiha ke bhi eajaz se ramz
hai tujhe khana-kharabi hi agar madd-e-nazar
kijiyo ai falak us khana-bar-andaz se ramz
ramz-e-‘ehsan’ se hai yaani ki ghazal aur bhi padh
siikh jaae koi us chashm-e-fusun-saz se ramz
Leave a Reply