ham dil ki nigahon se jahan dekh rahe hain
vo baat nazar vaale kahan dekh rahe hain
jin hathon men kal amn ka parcham tha unhi men
hairat hai ki shamshir-o-sinan dekh rahe hain
kya janiye kyuun sog ka manzar hai chaman men
ḳhamosh zaban ashk ravan dekh rahe hain
aḳhir koi afsos kare bhi to kahan tak
har samt tabahi ka saman dekh rahe hain
aa.ega dil-o-jan bhi luTane ka zamana
kuchh aaj bhi ulfat ka nishan dekh rahe hain
mumkin hai ḳhirad-mandon ko divana bana de
jo azm mire dil men javan dekh rahe hain
un se koi ummid-e-vafa rakhe to kaise
har baat men jo sud-o-ziyan dekh rahe hain
ḳhamoshi se hal apne masa.il nahin honge
kuchh kahiye ‘sahar’ ahl-e-zaban dekh rahe hain
Leave a Reply