Hum Dil Ki Nigahon Se Jahan Dekh Rahe Hain

ham dil kī nigāhoñ se jahāñ dekh rahe haiñ

vo baat nazar vaale kahāñ dekh rahe haiñ

jin hāthoñ meñ kal amn kā parcham thā unhī meñ

hairat hai ki shamshīr-o-sināñ dekh rahe haiñ

kyā jāniye kyuuñ sog kā manzar hai chaman meñ

ḳhāmosh zabāñ ashk ravāñ dekh rahe haiñ

āḳhir koī afsos kare bhī to kahāñ tak

har samt tabāhī kā samāñ dekh rahe haiñ

aa.egā dil-o-jāñ bhī luTāne kā zamāna

kuchh aaj bhī ulfat kā nishāñ dekh rahe haiñ

mumkin hai ḳhirad-mandoñ ko dīvāna banā de

jo azm mire dil meñ javāñ dekh rahe haiñ

un se koī ummīd-e-vafā rakhe to kaise

har baat meñ jo sūd-o-ziyāñ dekh rahe haiñ

ḳhāmoshī se hal apne masā.il nahīñ hoñge

kuchh kahiye ‘sahar’ ahl-e-zabāñ dekh rahe haiñ

Leave a Comment