Hashim Raza Jalalpuri
zaminon men sitare bo raha huun
mujhe hargiz na kahna ro raha huun
gavahi den samundar chand sahil
akela huun kabhi main do raha huun
use lauTa diya main ne ye kah kar
abhi jaao abhi main so raha huun
mohabbat ki kahani bhi ajab hai
jise paaya nahin tha kho raha huun
purane par na.e kuchh zaḳhm kha kar
lahu se main lahu ko dho raha huun
duaon ke vasile se main ‘hashim’
yahan ka tha vahan ka ho raha huun
Leave a Reply