Qaisarul Jafri
dil be-tab-o-tab ho gaya hai
a.ina ḳharab ho gaya hai
har shaḳhs hai ishtihar apna
har chehra kitab ho gaya hai
har saans se aa rahi hain lapken
har lamha azaab ho gaya hai
jis din se bane ho tum masiha
haal aur ḳharab ho gaya hai
honTon pe khila hua tabassum
zaḳhmon ki naqab ho gaya hai
socha tha to ishq tha haqiqat
dekha hai to ḳhvab ho gaya hai
‘qaisar’ gham-e-zindagi simaT kar
ik jam-e-sharab ho gaya hai
Leave a Reply