dekhe hain jo gham dil se bhula.e nahin jaate
ik umr hui yaad ke saa.e nahin jaate
ashkon se ḳhabar-dar ki a.ankhon se na niklen
gir jaa.en ye moti to uTha.e nahin jaate
har jumbish-e-daman-e-junun jan-e-adab hai
is raah men adab sikha.e nahin jaate
ham bhi shab-e-gesu ke ujalon men rahe hain
kya kijiye din pher ke laa.e nahin jaate
shikva nahin samjha.e koi charagaron ko
kuchh zaḳhm hain aise ki dikha.e nahin jaate
ai dast-e-jafa sar hain ye arbab-e-vafa ke
kaT jaa.en to kaT jaa.en jhuka.e nahin jaate
ai ‘hosh’ gham-e-dil ke charaghon ki hai kya baat
ik baar jala do to bujha.e nahin jaate
Leave a Reply