Ye Kaun Meri Tishnagi Badha Badha Ke Chal diya

Akbar Hyderabadi

ye kaun meri tishnagi baḌha baḌha ke chal diya

ki lau charagh-e-dard ki baḌha baḌha ke chal diya

ye mera dil hi janta hai kitna sang-dil hai vo

ki mujh se apni dosti baḌha baḌha ke chal diya

bichhaḌ ke us se zindagi vabal-e-jan ho gai

vo dil men shauq-e-ḳhud-kushi baḌha baḌha ke chal diya

karun to ab main kis se apni vus.at-e-nazar ki baat

vo mujh men hiss-e-agahi baḌha baḌha ke chal diya

na diid ki umiid ab na lutf-e-naghma-e-visal

ki lai vo saz-e-hijr ki baḌha baḌha ke chal diya

vo aaya ‘akbar’ is ada se aaj mere samne

ki ik jhalak si ḳhvab ki dikha dikha ke chal diya