Qabil Ajmeri
jahan-e-arzu avaz hi avaz hota hai
baḌi mushkil se ehsas-e-shikast-e-saz hota hai
hamen kya aap anjam-e-mohabbat se Darate hain
hamare ḳhuun se har daur ka aghaz hota hai
qafas hai daam hai bhaḌki hui hai atish-e-gul bhi
isi mahaul men andaza-e-parvaz hota hai
pighal jaati hain zanjiren sulag uThti hain divaren
lab-e-ḳhamosh men vo shola-e-avaz hota hai
mohabbat ki haqiqat khul ga.i chak-e-gireban se
junun bhi ek manzil men zamana-saz hota hai
hamin par munhasir hai raunaq-e-bazm-e-jahan ‘qabil’
koi naghma ho apna hi rahin-e-saz hota hai
Leave a Reply