savan ka mahina bhi hai barish bhi nahin hai
sukhe hue kheton pe navazish bhi nahin hai
ab sar-ba-gareban hai mire shahr ka mausam
ahbab bhi ḳhamosh hain sazish bhi nahin hai
har moḌ pe milti hain tahayyur ki lakiren
pahle ki tarah tarz-e-nigarish bhi nahin hai
har gaam pe tufan ka tasalsul hai mire saath
pairon men abhi tak mire laghzish bhi nahin hai
main raḳht-e-safar bandh ke nikla to huun ghar se
har gosha-e-dil men koi ḳhvahish bhi nahin hai
sakit hai faza vaqt ki masmum hava se
titli ke paron men koi jumbish bhi nahin hai
mehnat ka sila kaise karega vo muqarrar
‘ḳhalid’ mire hamrah sifarish bhi nahin hai
Leave a Reply