Kausar Jayasi
taḳhliq ke parde men sitam TuuT rahe hain
aazar hi ke hathon se sanam TuuT rahe hain
Dhaa.i kahin jaati hai jo ta.amir-e-mohabbat
mahsus ye hota hai ki ham TuuT rahe hain
suljhe na masa.il gham o aflas ke lekin
tafsir-e-masa.il men qalam TuuT rahe hain
be-faiz guzar jaate hain gulshan se hamare
mausam ke bhi ab qaul-o-qasam TuuT rahe hain
raqqas-e-shabistan-e-havas tujh ko ḳhabar hai
a.ine tire zer-e-qadam TuuT rahe hain
raat aur javan ho to ujala ho faza men
palkon se sitare abhi kam TuuT rahe hain
bedar hue jaate hain ijad ke sho.ale
har lahza tilismat-e-adam TuuT rahe hain
allah-re kashish us nigah-e-zohd-shikan ki
markaz se ghazalan-e-haram TuuT rahe hain
allah ke hote mujhe kyuun fikr ho ‘kausar’
bandon ke jo a.in-e-karam TuuT rahe hain
Leave a Reply