Poet
ḳhuda se ashna.i chahta huun
magar kuchh rahnuma.i chahta huun
koi andaz ho lekin achhuta
vo naz-e-dil-ruba.i chahta huun
bahut nadim huun apni hasraton par
are tauba ḳhuda.i chahta huun
ijazat ho to dil ka haal kah luun
ki main bhi lab-kusha.i chahta huun
mata-e-dard-e-dil ko kam mili hai
tavajjoh intiha.i chahta huun
samajh to luun hayat-e-ishq kya hai
zara si kaj-ada.i chahta huun
chaman-ara.iyan un ko mubarak
farogh-e-ḳhud-numa.i chahta huun
tiri mahfil tak aaya to huun lekin
tire dil tak rasa.i chahta huun
nasheman men bhi dil ukta raha tha
qafas se bhi riha.i chahta huun
ta.alli hai jo sharh-e-zabt-e-gham men
saza-e-ḳhud-sata.i chahta huun
suna hai husn abhi hai na-mukammal
ghazal ki rahnuma.i chahta huun
ba-juz us ke koi hasrat nahin hai
main us dar ki gada.i chahta huun
chalun us dar pe ‘nudrat’ chal ke dekhun
jo qismat-azma.i chahta huun
Leave a Reply