Waqt Se Pahle Hui Sham Gila Kis Se Karun

vaqt se pahle hui shaam gila kis se karun

rah gae kitne mire kaam gila kis se karun

apni nakam tamanna ka sabab main to na thi

aa gaya mujh pe hi ilzam gila kis se karun

dil hirasan hai bahut dekh ke anjam-e-vafa

ai miri hasrat-e-nakam gila kis se karun

ab to vo mujh se milata hi nahin apni nazar

ab chhalakte hi nahin jaam gila kis se karun

mere qadmon ne mira saath kahan chhod diya

manzil-e-shauq thi do-gam gila kis se karun

hijr ka rog bhi rusvai bhi paai ‘rumi’

puchh mat ishq ka anjam gila kis se karun

Leave a Comment