Aziz Qaisi
har aankh lahu sagar hai miyan har dil patthar sannaTa hai
ye ganga kis ne paaTi hai ye parbat kis ne kaaTa hai
chahat nafrat duniya uqba ye ḳhair ḳharabi dard dava
har dhanda ji ka jokhim hai har sauda jaan ka ghaTa hai
kya jog samadhi-o-rasdhi kya kashf-o-karamat jazb-o-junun
sab aag hava paani miTTi sab daal namak aur aaTa hai
ye raas rang ye mel milan ik haath men chand ik men suraj
ik raat ka mauj maza saara ik din ka sair-sapaTa hai
ghaT ghaaT andhera hai kaise bhandhoge kahan nayya apni
avaz kise doge ‘qaisi’ chau-dham yahan sannaTa hai
Leave a Reply