Rahat Indori
uThi nigah to apne hi ru-ba-ru ham the
zamin a.ina-ḳhana thi char-su ham the
dinon ke ba.ad achanak tumhara dhyan aaya
ḳhuda ka shukr ki us vaqt ba-vazu ham the
vo a.ina to nahin tha par a.ine sa tha
vo ham nahin the magar yaar hu-ba-hu ham the
zamin pe laḌte hue asman ke narghe men
kabhi kabhi koi dushman kabhu kabhu ham the
hamara zikr bhi ab jurm ho gaya hai vahan
dinon ki baat hai mahfil ki aabru ham the
ḳhayal tha ki ye pathrav rok den chal kar
jo hosh aaya to dekha lahu lahu ham the
Leave a Reply