taKHliq Kise Kahte Hain Hai Azmat-E-Fan Kya

taḳhlīq kise kahte haiñ hai azmat-e-fan kyā

āvāz-faroshoñ ke liye sher-o-suḳhan kyā

phūloñ kī tijārat kā chalan aam hai ab bhī

luTtī hī rahegī yūñhī taqdīs-e-chaman kyā

mazlūm kī chīḳhoñ ko bhī suntā nahīñ koī

is shahr meñ baste haiñ sabhī sañg-badan kyā

ham aa to ga.e ban ke ziyā zulmat-e-shab meñ

is ghor añdhere meñ magar ek kiran kyā

vaqt aane pe sar apnā kaTā dete haiñ ‘rahbar’

ham ko nahīñ mālūm ki hai hubb-e-vatan kyā

Leave a Comment