apne hone ka ik ik pal tajraba karte rahe
nok-e-neza par bhi ham raqs-e-ana karte rahe
ik musalsal jang thi khud se ki ham zinda hain aaj
zindagi ham tera haq yuun bhi ada karte rahe
haath men patthar na tha chehre pe vahshat bhi na thi
phir vo kya tha jis pe ham yuun qahqaha karte rahe
kuchh na kuchh to pesh-e-manzar men bhi shayad tha kahin
kuchh pas-e-manzar bhi ham ab-o-hava karte rahe
be-talab badhta raha har lamha qarz-e-jan ka bojh
be-sabab hi har nafas khud ko ada karte rahe
duur tak phaila diye kohsar jangal vadiyan
rizq ankhon ko diya har pal naya karte rahe
tum to ai khushbu havao us se mil kar aa gaiin
ek ham the zakhm-e-tanhai hara karte rahe
zahr khud bote rahe ujli havaon men ‘kamal’
chand sanson ko bhi ham be-zaiqa karte rahe
Leave a Reply