Pahli Kiran

koi mujh ko daur-e-zaman-o-makan se nikalne ki surat bata do

koi ye sujha do ki hasil hai kya hasti-e-raegan se

ki ghairon ki tahzib ki ustuvari ki khatir

abas ban raha hai hamara lahu momyai

main us qaum ka fard huun jis ke hisse men mehnat hi mehnat hai nan-e-shabina nahin hai

aur is par bhi ye qaum dil shaad hai shaukat-e-bastan se

aur ab bhi hai ummid-e-farda kisi sahir-e-be-nishan se

miri jaan shab-o-roz ki is mashaqqat se tang aa gaya huun

main is khisht-kobi se ukta gaya huun

kahan hain vo duniya ki tazin ki arzuen

jinhon ne tujhe mujh se vabasta-tar kar diya tha

tiri chhatiyon ki ju-e-shir kyuun zahr ka ik samundar na ban jaae

jise pi ke so jaae nannhi si jaan

jo ik chhipkili ban ke chimti hui hai tere sina-e-meharban se

jo vaqif nahin tere dard-e-nihan se

ise bhi to zillat ki pabandagi ke liye ala-e-kar banna padega

bahut hai ki ham apne aaba ki asuda-koshi ki padash men

aaj be-dast-o-pa hain

is ainda naslon ki zanjir-e-pa ko to ham tod Dalen

magar ai miri tiira raton ki sathi

ye shahnaiyan sun rahi ho

ye shayad kisi ne masarrat ki pahli kiran dekh paai

nahin is dariche ke bahar to jhanko

khuda ka janaza liye ja rahe hain farishte

usi sahir-e-be-nishan ka

jo maghrib ka aaqa tha mashriq ka aaqa nahin tha

ye insan ki bartari ke nae daur ke shadyane hain sun lo

yahi hai nae daur ka partav-e-avvalin bhi

utho aur ham bhi zamane ki taaza viladat ke is jashn men

mil ke dhumen machaen

shuaon ke tufan men be-mahaba nahaen

Leave a Comment