Nushur Wahidi
duniya sanvar ga.i hai nizam-e-digar ke ba.ad
manzil pe aa ga.i hai mashiyyat safar ke ba.ad
jaise dil-o-nazar ke hijabat uTh ga.e
aalam ḳhabar ka hai nigah-e-be-ḳhabar ke ba.ad
laale men rang hai ye kahan ye lahu tarang
duniya hasin hai mire zauq-e-nazar ke ba.ad
biiti hui hayat mohabbat ka tazkira
sham-o-sahar ki yaad hai sham-o-sahar ke ba.ad
main aa gaya sukut-o-tabassum ke darmiyan
vo muskura diye suḳhan-e-muḳhtasar ke ba.ad
har raste ko luuT liya e’timad ne
rahzan bhi ek shai hai magar rahbar ke ba.ad
tariki-e-hayat men raḳhshan hai husn-e-dost
jalve kahan rahenge hujum-e-nazar ke ba.ad
hasil hai ka.enat ka dard-e-dil-e-hayat
duniya men kya raha miri ah-e-sahar ke ba.ad
manzil pe chhiḌ ga.i hai kudurat ki dastan
har karvan ne gard uḌaa.i safar ke ba.ad
naqsh-e-qadam ki aankh khuli teri raah men
raste bhi so ga.e hain tiri rahguzar ke ba.ad
ahl-e-hunar ko dekh raha huun ghamin ‘nushur’
duniya hunar hai raas bhi aa.e hunar ke ba.ad
Leave a Reply