Khumar Mirzada
hikayaton se fasanon se ret uḌti hai
yahan qadim zamanon se ret uḌti hai
nasheb-e-jan se umaDte hain taza-rau dariya
buland-bam makanon se ret uḌti hai
lapak alag hai chamak aur hai lalak hai juda
ye kaisi kaisi uThanon se ret uḌti hai
yahan kitabon se jhaḌti hain bhurnhuri sadiyan
aur ek shelf ke ḳhanon se ret uḌti hai
ba-najd ḳhatir-e-majnun vara-e-shauq-o-junun
uḌe to kitne bahanon se ret uḌti hai
hamari naqsh-numa.i ko chaTne ke liye
tire tamam jahanon se ret uḌti hai
yahin kahin the vo lahren uchhalne vaale
hamare dil men zamanon se ret uḌti hai
Leave a Reply