Wo Mere Gham Mein Bhi KHandan Nahin Hone Pata

vo mire ġham meñ bhī ḳhandāñ nahīñ hone paatā

haa.e vo kufr jo īmāñ nahīñ hone paatā

vo nasheman ki jo barbād-e-bahārāñ ho jaa.e

vo kahīñ soḳhta-sāmāñ nahīñ hone paatā

ho agar hosh bhī ehsās-e-bahārāñ meñ sharīk

chaak apnā bhī garebāñ nahīñ hone paatā

itnī āsāñ bhī ġham-e-dost kī takmīl nahīñ

ghar bhī ujḌe to bayābāñ nahīñ hone paatā

yuuñ bhī ik umr guzar jaatī hai milte milte

ek ko ek kā irfāñ nahīñ hone paatā

‘shor’ ḳhāmosh nahīñ mere hī zindāñ ke charāġh

shahr-e-ḳhūbāñ bhī charāġhāñ nahīñ hone paatā

Leave a Comment