ḳhvabon ki baat ankhon se Taali nahin ga.i
ik shab bhi meri ḳham-ḳhayali nahin ga.i
us ka hi saath mujh ko mayassar nahin hua
yuun to miri dua kabhi ḳhali nahin ga.i
mujh se bichhaḌ ke vo bhi akela raha magar
chhoTi si baat dil se nikali nahin ga.i
saath apne meri niind bhi le kar chala gaya
jab se gaya vo aankh ki laali nahin ga.i
us ne bhi saf-goi se daman chhuḌa liya
ḳhush-fahmi apne dil se bhi paali nahin ga.i
yuun us ki adaton men taghaful shumar tha
rishton ki bag-Dor sambhali nahin ga.i
‘alka’ vo jis ne phunk diya mera ashiyan
yadon se umr-bhar vo divali nahin ga.i
Leave a Reply