hijr men bhi ye miri saans agar baaqi hai
is ka matlab hai mohabbat men asar baaqi hai
chhod ye baat mile zakhm kahan se tujh ko
zindagi itna bata kitna safar baaqi hai
tum sitamgar ho na ghabrao miri halat par
zakhm sahne ka abhi mujh men hunar baaqi hai
hijr ki aag men jalne se nahin darti main
ishq mujh men abhi be-khauf-o-khatar baaqi hai
mere tinke bhi hue raakh to kya harj bhala
atish-e-ishq bata kitna ye ghar baaqi hai
saans lena hi to ‘shahin’ nahin hai jivan
dhund kar laao miri ruuh agar baaqi hai